Имрӯз, 24.01.2020, соати 16:00 дақиқа дар ш.Душанбе Иҷлосияи ғайринавбатии Маҷлиси миллии Маҷлиси Олии ҶТдаъвати панҷум даъват карда мешавад.

 Гуфта мешавад, ки ба баррасии иҷлосияи ғайринавбатии Маҷлиси миллии Маҷлиси Олии ҶТ даъвати панҷум 2 масъала-озод ва таъин намудани Прокурори генералии ҶТ ва Қонуни ҶТ«Оид ба ворид намудани тағйир ба Қонуни Ҷумҳурии Тоҷикистон «Дар бораи хусусигардонии моликияти давлатӣ» пешниҳод мегардад. Яъне, имрӯз намояндагони МММО ҶТ барои озод намудани Прокурори генералии ҶТ Юсуф Раҳмон ва интихоби Прокурори нави генералии кишвар бояд ризоият бидиҳанд. Оё Юсуф Раҳмон дар вазифаи худ мемонад ва ё нафари дигар ҷойгузини он хоҳад шуд, соатҳои наздик хоҳем фаҳмид.

    Президенти ҶТ Эмомалӣ Раҳмон аз байни рамзҳои пешниҳоднамудаи рассомон, дизайнерон ва устодони Донишкадаи давлатии санъати тасвирӣ ва дизайни Тоҷикистон рамзҳои «30-солагии Истиқлолияти давлатии Ҷумҳурии Тоҷикистон» ва «Солҳои рушди деҳот, сайёҳӣ ва ҳунарҳои мардумӣ» эълон гардидани солҳои 2019-2021-ро бо мақсади муаррифии ҳамаҷонибаи иқдоми мазкур тасдиқ намуданд.

   Бояд гуфт, ки рамзи «30-солагии Истиқлолияти давлатии Ҷумҳурии Тоҷикистон» дар шакли мудаввар таркиббандӣ шуда, давродаври он ба забонҳои тоҷикӣ ва англисӣ «Истиқлолияти давлатии Ҷумҳурии Тоҷикистон» ва рақамҳои «1991-2021» бо рангҳои зарҳалӣ навишта шудааст.

    Дар қисми марказӣ рақами 30 бо ҳошияи зарҳалӣ бо истифода аз рангҳои парчами миллӣ ва дар қисми болои рақам яке аз рамзҳои давлатдории тоҷикон-тоҷ дар заминаи кӯҳҳои пурбарф ҷой дода шудааст. Қисми поёни рақам ҳадафҳои стратегии Ҳукумати ҶТдар бар гирифта, бо тасвири роҳи сеқабата, агрегати НБО, обпарто ва нақб-ифодагари дастовардҳои назарраси кишвар мебошанд. Дар қисми мобайнӣ дарахтони сарсабз, дашту пуштаҳо ва боғҳо нишонае аз рушди деҳот буда, баёнгари табиати биҳиштосои кишвар маҳсуб меёбад.

Тоҷ, рақами 30, осмони соф ва кӯҳҳо аз фазои сулҳу суботи Тоҷикистони соҳибистиқлол дарак медиҳанд.

     Гирдогирди рамзи «Солҳои рушди деҳот, сайёҳӣ ва ҳунарҳои мардумӣ 2019-2021» бошад 3 хати доирашакли сурх, сафед ва сабз фаро гирифтааст, ки таҷассумгари Парчами давлатӣ маҳсуб меёбанд. Инчунин, 2 хати иловагии доирашакли кабудранг ва ҳафт ситора низ рамзҳои миллиро ифода мекунанд. Дар гирди рамз бо забонҳои тоҷикиву англисӣ «Солҳои рушди деҳот, сайёҳӣ ва ҳунарҳои мардумӣ 2019-2021» навишта шудааст. Дар маркази доира ҷузъиёти асосии рамз-кӯҳҳои сарбафалаккашидаи Тоҷикистон, офтоби оламоро, манзараҳои зебои ҳаёти деҳот, роҳу нақбҳо ва сайёҳ чун нишонаи рушди сайёҳӣ, рубоб, кӯза ва анору ангур ҳамчун рамзи кишоварзӣ ҷой дода шудааст, ки таҷассумкунандаи макони меваҳои шаҳдбор будани диёри зебоманзари Тоҷикистон ба ҳисоб мераванд. Ҳамзамон, мусаввараҳо бо нақшу нигорҳои миллӣ оро дода шудааст, ки идомаи ҳунарҳои мардумӣ мебошанд. Дар маҷмӯъ, рамзи мазкур чор ҳадафи стратегии Ҷумҳурии Тоҷикистон-расидан ба истиқлолияти энергетикӣ, таъмини амнияти озуқаворӣ, раҳоӣ аз бунбасти коммуникатсионӣ ва саноатикунонии босуръати мамлакатро бо тасвир кардани дарғот, нақб, роҳ ва меваҷот ифода мекунад.

    Ширкатҳои ҳавопаймоии «Сомон эйр»-и тоҷик ва «Хатҳои ҷанубии Хитой»-и Ҷумҳурии мардумии Хитой парвозҳои худро ба Душанбеву Урумчи муваққатан қатъ карданд. 

    Ин маҳдудият то рӯзҳои аввали моҳи феврал идома дошта, парвози наздиктарини ширкати «Хатҳои ҷанубии Хитой» дар самти Урумчи-Душанбе-Урумчи ба рӯзи 2.02.2020 гузошта шудааст. Парвози наздиктарини ширкати «Сомон эйр» аз рӯи масири Душанбе-Урумчи-Душанбе бошад рӯзи 5.02.2020 амалӣ хоҳад ёфт. Дар ин бора ба мухбири СССР дар маркази матбуоти Фурудгоҳи байналмилалии Душанбе хабар доданд.

    Тавре гуфта мешавад, сабаби қатъи муваққатии парвозҳо байни Тоҷикистону Хитой ин соли нави хитоӣ мебошад, ки ба рӯзи 25.01.2020 рост меояд ва дар рӯзҳои таҷлили ин ид тамоми Хитой ба истироҳати 15 рӯза рафта, марказҳои бузурги хариду тиҷоратӣ низ ба таътил мебароянд. Масъулон мегӯянд, ки сабаби қатъи муваққатии парвозҳо дар ин аст, на дар хуруҷӣ бемории зукком, ки тайи 2 ҳафта боз дар ин кишвар сар зада, алакай ҷони беш аз 20 нафарро бурдааст. Ба хотири пешгирӣ намудани вуруди ин беморӣ ба кишвар дар гузаргоҳҳои марзӣ ва фурудгоҳи байналмилалии Душанбе гуруҳи махсуси табибону мутахассисон кор карда истодааст. Бояд гуфт, ки парвозҳо дар ин масир ҳафтае 4 маротиба сурат мегирифтанд.

СССР

Кормандони милитсияи пойтахт дар 1 ҳафтаи охир дар доираи роҳандозӣ намуданаи идомаи амалиёти «Корд» 10-нафарро боздошт намуданд, ки номбурдагон бо худ силоҳи сард мегардониданд. 

 Тавре ба мухбири СССР сардори маркази матбуоти РВКД ҶТ дар ш.Душанбе Сироҷиддин Шукурӣ хабар дод, ин 10 нафари боздоштшуда бо худ корд доштанд. Вобаста ба ҳолатҳои мазкур нисбати он нафароне, ки дар рафти амалиёт боздошт ва аз онҳо чунин силоҳҳо дарёфту мусодира карда шуд, чораҳои гуногуни таъсиррасони қонунӣ, аз ҷумла нисбати 2 нафар ҳабси маъмурӣ, нисбати волидайни 1 нафар ноболиғ протоколи маъмурӣ бо моддаи 90-и Кодекси ҳуқуқвайронкунии маъмурии ҶТ ва нисбати 7-нафари дигар ҷаримаҳои маъмурӣ татбиқ карда шуданд.

   Бояд гуфт, ки бо мақсади пешгирии содиршавии ҷиноятҳо бо истифода аз силоҳи сард бо ташаббуси Раёсати ВКД дар ш.Душанбе дар ҳудуди пойтахт амалиёти шартӣ бо номи «Корд» дар якчанд марҳила роҳандозӣ гардида, милитсияи пойтахт то пурра решакан намудани ин падидаи номатлуб дар ҷомеа мубориза хоҳад бурд. 

Шералӣ Давлатов, СССР

Новобаста аз ҳисоботҳои ҶСК «Телерадиоком» дар бораи насби фиристандаҳои рақамӣ ва таҷҳизоти муосири мавҷзананда дар миқёси мамлакат, боз ҳам дастрасӣ ба ТВ-ҳои марказӣ мушкилзо мегардаду сокинони бархе аз минтақаҳои кишвар аз тамошои шабакаҳои давлатӣ маҳрум шуда истодаанд.

Мухлисони газетаи мардумии СССР дар бораи дастрасӣ надоштан ба шабакаҳои телевизионии давлатии мамлакат хеле зиёд мегӯянду менависанд. Алалхусус, сокинони ноҳияҳои наздимарзии кишвар бо ҷумҳуриҳои Ӯзбекистону Қирғизистон ва Афғонистон на як бору ду бор дар бораи қадам ба қадам ғасб шудани мавҷҳои шабакаҳои телевизионии тоҷик аз ҷониби фиристандаҳои телерадиокоммуникатсионии ин давлатҳо ҳушдор медиҳанд.

«Том ва Ҷеррӣ»-и қирғизиву «мутар»-и афғонӣ…

    Чанде пеш яке аз хонандагон ва муаллифони доимии газета аз ш.Истаравшан Маннон Махсумов дар робита ба гум шудани ТВ-ҳои ватанӣ дар каналҳои ин шаҳр ва ба ҷойи каналҳои тоҷикӣ пайдо шудани каналҳои ТВ ӯзбекӣ изҳори нигаронӣ кард. Ба ғайр аз эшон, боз чанд тан аз муаллифони ҳамешагии газетаи СССР аз ноҳияҳои Б.Ғафуров, Ашт, Зафаробод, Исфара, Мастчоҳ, Панҷакент, Турсунзода, Шаҳритуз, Фархор, Панҷ, Дарвоз, Ишкошим ва Мурғоб низ занг зада аз дастрасӣ надоштан ба шабакаҳои телевизионии ватанӣ шикоят карда, менавиштанд, ки мавҷ ҳаст, аммо тез-тез гум шуда, ба ҷойи онҳо каналҳои ӯзбекиву қирғизӣ ва афғонӣ пайдо шуда, пахшашон тоза ва бидуни ягон нуқсони техникист. Ва ин рӯзи аввал нест! Вазъият ба ҳадде расидааст, ки кӯдакон дар ҷамоятҳои н.Б.Ғафуров филми тасвирии «Том ва Ҷеррӣ»-ро алакай бо забони қирғизӣ аз худ кардаанду мардуми бархе аз деҳаҳои наздимарзии Фархор, ки мухлиси сериалҳои афғонианд, мошинро «мутар» мегуфтагӣ шудаанд.

   Холо мо Мурғобу Ашту Исфараву Панҷакентро 1 сӯ мегузорем, дар бархе аз деҳаҳои ш.Турсунзода, ки аз пойтахт ҳамагӣ дар масофаи 40 дақиқа воқеъ аст, дар бораи каналҳои телевизионии тоҷик умуман тасаввурот надоранд-чун ТВ тоҷикӣ намебинанд! Аз он ҷумла дар деҳаи дурдасти Шулум, ки шабакаҳои телевизионии ӯзбекӣ минтақаро пурра фарогир шудаву ман шахсан худам соли гузашта зимни сафар ба ин деҳа шоҳиди он гашта будам. 

   Хуллоса, новобаста аз ҳисоботҳои хушбинкунандаи ҶСК «Телерадиоком» дар бораи насби фиристандаҳои рақамӣ ва таҷҳизоти муосири мавҷзананда дар миқёси мамлакат, боз ҳам дастрасӣ ба шабакаҳои ТВ тоҷикӣ мушкилзо мегардаду сокинони минтақаҳои дар боло зикршуда аз тамошои шабакаҳои давлатии кишвар бо тадриҷ маҳрум шуда истодаанд.

«Телерадиоком», АЛЛЛООО!?

    Барои равшанӣ андохтан ба ин масъала ва огоҳ шудан аз вазъи воқеӣ мо тасмим гирифтем бо раҳбарияти ҶСК «Телерадиоком», ки таъмини амнияти иттилоотии кишвар дар бахши ТВ ва радио вазифаи ҷониашон аст, сӯҳбат намоем. Номаи мухбирони редаксияи Газетаи мардумии СССР ба унвони ин ниҳод ким-кай, 27.12.2019 равона шуд, вале аз ин Кумита на пай ҳасту на Ҳайдар. 

   Тавре ба мо дар шуъбаи умумии Кумитаи РТВ рӯзи 9.01.2020 хабар доданд, номаи мо пеш аз фарорасии соли нави милодӣ ба унвони директори ҶСК «Телерадиоком» Хуршед Ҳабибов ирсол гаштааст, вале бо гузашти 15 рӯз мо аз ин ҷамъият натавонистем на хабаре бигирем ва на ҷавобе.  Ҳоло он, ки тибқи Фармони Президенти ҶТ Эмомалӣ Раҳмон таҳти №622 шахсони мансабдор бояд дар муддати 3 рӯзи расидани номаву дархост вокуниш нишон дода, посух бигӯянд. Идораи ин ҷамъиятро низ натавонистем пайдо кунем-ба тозагӣ ба макони нав кӯчидаанд…

   Пас аз зангҳои пайдарпай мо тавонистем бо яке аз муовинони Хуршед Ҳабибов сӯҳбати телефонӣ намуда, суолҳои редаксия ва хонандагонро вобаста ба таъмини амнияти иттиллоотӣ ба мавсуф тариқи почтаи электронӣ фиристем. Зимни сӯҳбат таъкид ҳам намудем, ки дар сурати дастрас нашудани посух мо ҳатман тариқи рӯзнома ба Хуршед Ҳабибов муроҷиат хоҳем кард. Боз ҳам бо гузашти 3 рӯзи корӣ на ҷавобе шуд ва на вокунише. Ҳоло аз номи хонандагон ба таври расмӣ ба директори ҶСК «Телерадиоком» Хуршед Ҳабибов муроҷиат намуда, хостори онем, ки эшон ба суолҳои мо ҳарчӣ зудтар посухи расмӣ бигӯянд.

1.Лутфан бигӯед, ки идораи нави шумо дар куҷо ҷойгир аст ва таҷҳизоти ҶСК «Телерадиоком», ки дар бинои қаблии корхона дар маркази шаҳр қарор дошт, ҳоло дар куҷост? Аз рӯи овозаҳо бо сабаби набудани ҷойи муайян қисме аз таҷҳизот дар ҳудуди н.Рӯдакӣ ва бархе дар ҳудуди ш.Ҳисор дар анбор хобанд, оё ин овозаҳо асос доранд?

2. Дар тӯли соли 2019 чӣ қадар фиристандаҳои рақамии муосир насб карда шуданд ва дар кадом минтақаҳо? Дар умум, корхонаи шумо барои таъмини амнияти иттиллотии мамлакат чӣ тадбирҳои ҷиддиро анҷом додааст? 

3.Сокинони деҳоти дурманзари бархе аз шаҳру ноҳияҳои ҷумҳурӣ-Истаравшан, Мастчоҳ, Ашт, Зафаробод, Дарвоз, Ишкошим, Мурғоб, Фархор, Б.Ғафуров аз он шикоят мекунанд, ки шабакаҳои ӯзбекиву қирғизиву афғонӣ ҷойи шабакаҳои тоҷикиро танг намуда, ғасб карда истодаанд. Шарҳи шумо дар ин маврид…

4.Ва дар охир: имрӯз тамоми шабакаҳои телевизионӣ ва радиоии тоҷик бо таҷҳизоти наву муосир фаъолият намуда ба пахши рақамӣ гузаштаанд. Бо дарназардошти тамоми ин имконият оё гузаронидани «Рӯзи профилактика»-ҳар ҳафта рӯзи душанбе дуруст аст? 

Интизори посухи расмии шумо ба суолоти хонандагони Газетаи мардумии СССР ҳастем. Мо метавонем!

Ҷамила Ҳусейнова, СССР

     Аз пагоҳ, 24.01.2020 дар пойтахт хатсайри нави мусофирбарии автобусии №33  (фурудгоҳ-маҷмааи савдои «Кӯшониён») ба фаъолият шуруъ хоҳад кард.

    Тавре хабар дода мешавад, ин хатсайр тавассути хиёбону кӯчаҳои Мирзо Мастонгулов, Аҳмади Дониш, Дӯстии халқҳо, Мирзо Турсунзода, Рӯдакӣ, Ҳофизи Шерозӣ хизмат расонида, микроавтобусҳои хатсайри №33 бо роҳи пешина равуо хоҳанд кард.

Комиссияи марказии интихобот ва раъйпурсии ҶТ рӯйхати номзадҳоеро, ки аз тарафи ҳизбҳои сиёсии кишвар пешниҳод шуда буданд, тасдиқ кард.

 Гуфта мешавад, ки тибқи рӯйхати тасдиқкардашуда 70 нафар, аз ҷумла аз Ҳизби Халқӣ-Демократии Тоҷикистон-28 нафар, Ҳизби аграрии Тоҷикистон-13 нафар, Ҳизби демократии Тоҷикистон-4 нафар, Ҳизби ислоҳоти иқтисодии Тоҷикистон-7 нафар, Ҳизби коммунистии Тоҷикистон-6 нафар, Ҳизби сотсиалистии Тоҷикистон-8 нафар ва Ҳизби сотсиал-демократии Тоҷикистон- 8 нафари пешниҳодшуда тасдиқ карда шуд.

    Аз ҷумла, Саймурод Фаттоҳзода, Маҳмадалӣ Ватанзода, Ранохон Бобоҷониён, Насиба Содиқӣ, Дилрабо Мансурӣ, Сумангул Тағойзода, Фирӯза Шарифӣ, Идигул Қосимзода, Хайрулло Амонулло, Саодатшо Матробиён, Абдураҳим Холиқзода, Абдулло Табарӣ, Музаффарҷон Маҳмудов, Файзалӣ Идизода, Муҷибахон Ҷавҳарова, Бибиосия Аюбӣ, Шарофиддин Ҷӯразода, Файзалӣ  Назаров, Тағоймурод Ҳасанзода,  Рухсора Давлатзода, Сафиямоҳ Тешаева, Саёҳат Дадаҷонова,  Ҳабибулло Амирбекзода, Зулфия Давлатзода, Дилноза Аҳмадзода, Бахтиёр  Ҳамдамов, Фирдавс Ёдгорӣ,  Фариза Абдуллозода ҲХДТ-ро намояндагӣ хоҳанд кард. 

    Рустам  Латифзода, Фазлиддин Икромов, Мансур Усмонов,  Неъматулло Холбойзода, Зайниддин Сафаров, Мирзоанвар Ахмедов, Шодӣ Мӯсозода, Музаффар Мирзозода, Бахтиёр Аҳмадзода, Ҷонона Ҳайдарзода, Нуралӣ Ниёзов, Рупия Сафарова, Раҳмон Зиё ҳамчун  номзад аз ҲАТ, Саидҷаъфар Усмонзода, Диловар Холов, Таваралӣ  Зиёзода, Зӯҳро Мирзоева аз ҲДТ, Рустам Қудратов, Машраб Файзуллоев, Ғиёсиддин Ашӯров, Даринг Раҳмон Ҷаҳон Афруз Қурбонзода, Зафар Ализода, Абдулатиф Раҳимов, Баҳодур Раззоқов аз ҲИИТ, Мироҷ Абдуллоев, Зарагул Мирасанова, Қурбонҷон Мирзоева, Ҳабибулло Ёров, Ҳикматулло Ҳамидов,  Азизҷон Раҳмонов аз ҲКТ, Абдуҳалим Ғаффоров, Маъруфхуҷа Юсупов, Зариф Наимов, Миҷгона Рустамова, Фаррух Боқиев, Давлатхоним Саидошурова, Наргиза Бобоҷонова,  Уғул  Қобилова аз ҲСТ,  Раҳматилло Зойиров, Шокир Ҳакимов, Дилбар Самадова,  Бахтиёр Насруллоев, Нигина Шоназарова, Маҳмурод Одинаев, Қиёмиддин Азизов, Сиддиқ Саидов аз ҲСДТ дар рӯйхати тасдиқшуда ҷой гирифтаанд.