Отахон Латифӣ 18-уми марти соли 1936 дар шаҳри Панҷакент ба дунё омада, соли 1963 риштаи журналистии Донишгоҳи Ленинград, Санкт-Петербурги имрӯзаро хатм кардааст. Ӯ 4 сол дар рӯзномаи “Комсомолетс Таджикистана” ва аз соли 1967 то 1973 ба ҳайси хабарнигори рӯзномаи “Комсомолская Правда” дар Тоҷикистон фаъолият кардааст. Аммо нуқтаи авҷи маъруфияти Латифӣ ҳамчун журналист 16 соле буд, ки ӯ аз соли 1973 то 1989 дар рӯзномаи “Правда” – нашрияи асосии ҳизби ҳокими коммунисти СССР дар Тоҷикистон кор мекард. 

Дар он солҳо вақте ҷараёни сохтмони нерӯгоҳи Норак суст шуд, Латифӣ аз минбари “Правда” ташаббуси “эстафетаи коргарӣ”-ро дар миён гузошт, ки ба ин сохтмон ҷони нав дамид. Масъалаи дигаре, ки Латифӣ истодагарӣ кард, тарҳи сохтани обанбор дар қаламрави водии Вахш ва ба Қаршии Узбакистон кӯчондани сокинони ин водӣ буд, ки баъди мақолаи Латифӣ сарвазири вақти СССР Николай Косигин иҷрои ин тарҳро боздошт.

Дар поёни соли 1989 раҳбари вақти Тоҷикистон Қаҳҳор Маҳкамов Латифиро муовини сарвазир таъин кард. Соли 1991 Латифӣ довталабона аз ин мақом истеъфо дод ва ба журналистика баргашта, дар рӯзномаи “Известия” ба кор пардохт. Ӯ ҳамзамон раиси Иттифоқи журналистони Тоҷикистон интихоб шуд ва ҳамроҳ бо Алексей Сафаров, як соҳибкори тоҷики муқими Финландия ширкати “ЗарФин”-ро таъсис дод.

Баъди оғоз гардидани ҳодисаҳои маълум дар Ҷумҳурии Тоҷикистон  О. Латифӣ дар охирҳои соли  1992 ,  муддате дар Маскаву баъдан дар Теҳрон умр ба сар бурд.  Моҳи сентябри соли 1997, баъди се моҳи имзои созишномаи сулҳ, вақте барои иҷрои он Кумиссиюни оштии миллӣ таъсис ёфт, Латифӣ ба Душанбе баргашт ва то рӯзи кушта шуданаш ба ҳайси раҳбари зеркумиссиюни ҳуқуқии ин ниҳоди нозири раванди сулҳи Тоҷикистон кор кард.

Отахон Латифӣ дар ҷараёни музокироти сулҳи солҳои 90-уми кишвар яке аз шахсиятҳои асосӣ ба шумор мерафт. Аз инҷост, ки наҳзатиҳо чандон ӯро хуш қабул надоштанд.  Аз обрӯ ва эътибори ӯ ҳарос доштанд ва доим лаҳзаи даркориро интизор доштанд, то ки ӯро нобуд созанд. Зеро Отахон Латифӣ аз ҳадафи асосии наҳзатиҳои ифротӣ огоҳӣ дошт ва медонист, ки оянда фаъолият онҳо барои мардуми кишвараш танҳо қатлу куштор ва бадбахтиро пеш меоварад. 

Иброҳим Усмонов, вобаста ба зиддияти Отахон Латифӣ ва наҳзатиҳои ифротӣ чунин нақл менамояд: «Ман ба намояндагӣ аз ҷониби ҳукумат ва Отахон Латифӣ аз ҷониби мухолифон протоколи Хусдеҳро таҳия кардем ва қарор гузоштем, ки баъд аз 10 рӯз дар Маскав мулоқот мекунем. Аммо мухолифон ба Маскав бо таъхири дурӯза омада, изҳор доштанд, ки он санадро эътироф намекунанд. Намояндаҳои СММ ба мухолифон гуфтанд, ки агар аз имзо даст мекашед, пас, дигар ҷомеаи ҷаҳонӣ аз шумо пуштибонӣ намекунад. Тӯли се рӯзи дигар мо маҷбур шудем ба ин санад тағйирот ворид карда, сипас, музокиротро идома диҳем». 

Ҳақиқат ин аст, ки наҳзатиҳои ифротӣ доим дар паи нест намудани ӯ талош менамуданд.  Аз ин рӯ, дар таърихи 22-юми сентябри соли 1998 нақшаи наҳзатиҳо барои ҷисман нобуд кардани ин марди шуҷои ватан амалӣ гардид.   Ин журналист ва сиёсатмадори шинохтаи тоҷикро  дар назди манзилаш, дар маркази Душанбе дар як сӯиқасди мусаллаҳона бо се тири туфанг куштанд. Ин се тир риштаи умри нафареро канд, ки аз журналистони ангуштшумори соҳибмактаби тоҷик буд. Латифиро дар синни 62 ва замоне куштанд, ки ӯ баъди имзои созишномаи сулҳи соли 1997 тоза як сол боз ба Ватан баргашта, дар Кумиссиюни оштии миллӣ аз ҷониби оппозисиюн намояндагӣ мекард ва мӯътақид буд, ки Тоҷикистон бебозгашт пой ба роҳи сулҳ гузоштааст.

Ҳаёт, нанг, номус, сулҳ, суббот ватану миллат дар пеши наҳзатиҳо заррае арзиш надошту надорад. Барои саркардагону аъзоёни ташкилоти террористии наҳзатӣ пулу мол, давлату сарват, хунхориву ҷаллодӣ, қадру манзалати бештар дорад.  Таҳлили куштори   Отахон Латифӣ аз он гувохӣ медиҳад, ки аз як тараф наздик шудани ӯ ба Ҳукумати Тоҷикистон ва аз сӯйи дигар фосила гирифтанаш аз наҳзатиҳои ифротӣ онҳоро сахт нигарон намуда буд.  Табиати наҳзатиҳои хунхор чунин аст, ҳар нафаре, ки ҷонибдорӣ сулҳу суббот ва оромии кишвар бошад, дар чашми наҳзатиҳои сулҳбезору хунталаби аҷнабипараст хиёнаткор менамояду ҷазои чунин шахсонро марг медонанд.  

Отахон Латифӣ ҳамчун нишони ҷавонмардӣ, шахсияти беназир, журналистӣ сермасъул ва дипломатӣ закӣ  дар ёдҳо боқӣ мондааст. Агар умр вафояш мекарду наҳзатиҳои хунхор нисбаташ амали террористӣ анҷом намедоданд,    рӯзи 18-уми марти соли равон  78-сола мешуд. Ёдат ба хайр устоди гиромиқадр.

Назар Холназаров, ходими калони илмии АИ ҶТ  

То имрӯз 457171 адад кортҳои пластикии “City Card” ба мардум дастрас шуда, шумораи умумии терминалҳои “Express pay” 454 адад ва шумораи волидаторҳои насбшуда дар автобусу тролейбусҳо ва микроавтобуси “Мусича” 573 ададро ташкил медиҳад. Татбиқи ин лоиҳа боиси аз байн рафтани баҳсҳои тӯлонӣ миёни мусофиру ронанда ва кондуктор гашта, ҳаракати нақлиёти ҷамъиятӣ. Хосса автобусу троллейбус низ ба низоми нав даромад.  

Дар чанд шумораи гузашта мухбирони газетаи СССР дар бораи низоми электронии роҳкиро дар нақлиёти истифодаи умуми пойтахт ва фаъолияти корти нақлиётиву терминалҳои “City Card” навишта буданд. Пас аз нашри матлабҳои па дар пай масъулони ширкати “Авесто Гурӯҳ” бо мухбири газета вохӯрда. Эшонрог ба дафтари марказии худ даъват намуданд ва дар мавриди камбудиҳову нофаҳмиҳои ин низом шарҳи бештаре доданд.

Бояд гуфт, ки имрӯз дар ш. Душанбе  пардохти роҳкиро дар нақлиёти ҷамъиятӣ, махсус дар автобусу тролейбусҳои пойтахт тавассути низоми электронии пардохти “City Card” амалӣ шуда, татбиқкунандаи ин навгонӣ ширкати “Авесто Гурӯҳ” мебошад. Мутахасисони лоиҳа мегӯянд, ки ҳангоми роҳандозӣ намудани ин низом бовар надоштанд, ки дар ин мудати кӯтоҳ лоиҳа дар чунин сатҳ қарор мегирад. То имрӯз 457171 адад кортҳои пластикии “City Card” ба мардум дастрас шуда, шумораи умумии терминалҳои “Express pay” 454 адад ва шумораи волидаторҳои насбшуда дар автобусу тролейбусҳо ва микроавтобуси “Мусича” 573 ададро ташкил медиҳад. Татбиқи ин лоиҳа боиси аз байн рафтани баҳсҳои тӯлонӣ миёни мусофиру ронанда ва кондуктор гашта, ҳаракати нақлиёти ҷамъиятӣ. Хосса автобусу троллейбус низ ба низоми нав даромад.  

Пули терминалҳоро медузданд...

Бархе аз истифодабарандагони кортҳои нақлиётии “City Card” ҳанӯз ҳам тарзи дуруст истифода бурдани кортро пурра аз худ накарданд. Сокинон шикоят мекунанд, ки имрӯз дастрасӣ ва пур кардани суратҳисоби корт барояшон мушкил гардидааст. 

Зафар Бурҳонзода, директори иҷроияи ширкати “City Card” дар ин маврид мегӯяд, ки 3-4 ҳолати кор накардани терминал вуҷуд дорад, ки ин қабл аз ҳама қатъ шудани қувваи барқ, таъмин набудани шабакаи Интернет ва нодуруст истифода бурдани терминал мебошад. 

   -Яке аз сабабҳои асосии аз кор мондани терминалҳо дар он мебошад, ки сокинон ҳангоми дастрас ва ё пур намудани суратҳисоби худ ба терминалҳо пулҳои кӯҳнаю фарсуда, кортҳои нимшикаста, танга ва баъзан вақт, ҳатто коғаз ворид менамоянд, ки дар натиҷа терминалҳо аз кор мемонанд. Ҳолатҳое шудааст, ки бархе аз сокинон хунукназарона ё аз нодонӣ ба терминалҳо ҳатто шиносномаҳои пластикии худро ворид менамоянд. Ин амали онҳо ба дастрас кардани корт ва пур намудани мувозинати он ба дигар мусофирон халал мерасонад. Кормандони ширкати мазкур ҳамеша аз фаъолияти терминалу волидаторҳои насбшуда бохабар буда, назорати ҷиддӣ мебаранд. Назорат тариқи онлайн, яъне дар монитори насбшуда дар корхона ва телефонҳои мобилии шахсони масъул бурда мешавад ва дар ҳолати аз фаъолият мондани терминал мутахасисон аз ин бохабар шуда, ба макони қарордоштаи терминал ҳозир мешаванд, то мушкилиро бартараф созанд. Барои бартараф намудани ин мушкилиҳо ба мо вақт лозим аст, вале аз чӣ бошад сокинон ин нозукиҳоро фаҳмидан намехоҳанд. Баъзан вақт дар 1 шабонарӯз то 4-5 терминалҳои “Exspress Pay”, шикаста, маблағи дохили он дуздида мешавад. То аз нав барқарор намудани онҳо барои мо вақт ва маблағи калон лозим меояд, - афзуд Зафар Бурҳонзода.

Код ба ҷойи корт!

Бархе аз сокинон хоҳиш карда буданд, ки хизматрасонӣ ва истифодаи корти нақлиётиро афзун намоянд, ки тавассути 1 корт тавонанд на танҳо пули роҳкиро, балки маблағи дигар хизматрасиниҳо, аз ҷумла коммуналиро низ пардохт кунанд. Имрӯз ширкати “Авесто Гурӯҳ”  дар ин маврид як иқдоми хубе ба роҳ мондааст-бо гирифтани корт сокинон ва меҳмонон метавонад чӣ пардохти сӯзишворӣ, чӣ хариди мағоза, чӣ пули хӯрок дар тарабхона ва дигар хизматрасониҳоро супоранд. 

   -Ин лоиҳа тавассути корти миллии Бонки миллии Тоҷикистон роҳандозӣ шудааст. Ин кортҳо инчунин, дорои ҳамёни электронӣ низ ҳастанд. Ҳолатҳое мешаванд, ки мусофирон корти нақлиётии худро фаромуш ё гум карда, вориди нақлиёти ҷамъиятӣ шуда наметавонанд. Барои ҳамеша дастрас будани “City Card” мусофирон метавонанд дар телефони мобилии худ QR-коди корти худро ҷорӣ намуда, бе мушкилӣ ба волидатор наздик намоянду вориди автобус шаванд. Ин иқдомҳо баҳри сокинон бисёр хуб ва дар сатҳи баланд роҳандозӣ шудаанд, - қайд намуд Ҷомӣ Шарипов, роҳбари ширкати “City Card”.

Аз терминалҳо бояд дуруст истифода кард

Ба солҳои қабл қиёс карда метавон гуфт, ки имрӯз ин ширкати мазкур тавонист дар мудати кутоҳ ба бисёр мушкилиҳои мардум дар соҳаи нақлиёт, алалхусус баҳсу нофаҳмиҳо байни мусофир ва ронанда, баргардонии бақияпулӣ ва пардохтҳои хизматрасониҳои гуногун мусоидат намуда, барои сафар ва иҷрои дигар хизматрасониҳои ғайринақдӣ ба сокинон ва меҳмонони хориҷӣ шароити хубро фароҳам овард. Инчунин кортҳои имтиёзнок барои маъюбону нафаққахӯрон ва баъзе кормандони соҳаҳои мухталиф низ роҳандозӣ шудаасту онҳо имрӯз аз он бе мамониат истифода мебаранд. Татбиқкунандаҳои лоиҳа кӯшиш бар он медиҳанд, ки камбудию пешрафти ин лоиҳаро назорат кунанд. Дар оянда барои татбиқи дигар низому усулҳо дар ин соҳа корҳои муидро ба роҳ монда, мушкилиҳоро бартараф созанд. Сокинонро мебояд ба тарзи дуруст ва истифода аз терминалу волидаторҳо аҳамият дода, инчунин  хизмату фаъолият ва талоши кормандони ширкати “City Card”-ро ба назар гирифта, ҳангоми фаъол набудани терминал сабабҳои зикршударо дар хотир дошта, барои беҳтар шудани сатҳи хизматрасонӣ аз терминалҳо дуруст истифода баранд. 

Ситора Сафара, СССР

Мехоҳам ба вазири нави маориф ва илми кишвар Маҳмадисуф Имомзода якчанд хоҳишу пешниҳоди худро бирасонам.

Аз муаллими оддӣ сар карда, то директорони мактабҳою мудирони маориф аз аттестатсияи ҳаққонӣ гузаронида шуда, лаёқатмандҳо гузаронида ва нолоиқон ба дигар кор гузаранд. Чӣ даркор муаллими физикае, ки ба мафҳуми физика сарфаҳм  нарафта, ба хонандагон «нияти ғусл»-ро меомӯзонад? Ё як байти шоири хушбаён-Соиб дар китоби дарсии синфи 7-ум ғалат чоп шудааст, то ба имрӯз мушоҳида накардаем, ки муаллиме, олиме ба ислоҳи он кӯшиш карда бошад:

«Ҳар киро теғи забон нест ба фармон, Соиб,  

Оқибат куштаи шамшери забон мегардад».

Тамоми барномаҳои таълимию китобҳои дарсӣ аз нав тартиб дода шуда, дар онҳо муваффақиятҳои даврони сотсиалистӣ ҷой дода шавад. Ба Қонуни Ҷумҳурии Тоҷикистон «Дар бораи маориф» тағйирот ворид карда шуда, мисли пештара  «Ба фарзандон то синни 18-солагӣ таълимоти динӣ дода нашавад», навиштан даркор.

Нақши Иттифоқҳои касабаро дар соҳаи маориф баланд бардоштанд. Дуруст аст, ки мактаббачагон бояд либоси ягона дошта бошанд.

1 ҳлати дигар-дар ноҳияи мо (Дӯстӣ) амр кардаанд, ки аз 1 марти соли ҷорӣ духтарбачаҳо бо либоси «чакан» ба дарс биёянд. Як куртаи чакан аз 100 то 800 сомонӣ арзиш дораду оилае, ки 2-3 духтар дорад, чӣ кор мекарда бошад? Бе ин ҳам «пулҷамъкунӣ» ба авҷи аълояш рафта расидааст, «болои сӯхта намакоб» нашавад, мегӯем. Умед дорем, ки шумо ҳали ин мушкилиҳоро меёбед. 

Ҳаким Ғуломов, н. Дӯстӣ

Бо супориши редаксия ҳафтаи гузашта барои кандани дандон ба якчанд стоматологияҳои ш.Душанберо равона шудам. Қаблан аз бархе дӯстону ҳамкурсон пурсидам, ки барои муолиҷа ва кандани дандон ба кадом стамотологияҳо муроҷмиат мекунанду мераванд. Маълум гардид, ки сокинону меҳмони пойтахт бештар ба  Муассисаи давлатии “Пажуҳишгоҳи илмию клиникии стоматология ва ҷоғу рӯй”-и ш. Душанбе(1-ум Советский) муроҷиат менамудаанд.  Аз ин рӯ мо хостем ба ин муассиса назар карда, сатҳи хизматрасониро дар ин даргоҳи тиббӣ бубинем. 

Нархи ягона

Ҳангоми даромад ба ин муассиса посбоне бо ниқоби сафед назди дар истода, ҳамаи беморонро ба қайд мегирифт. Ман низ худро ба қайд гирифта, назди духтуре даромадам ва дар кадом вазъият будани дандонамро гуфтам. Духтури ҷавон дандонҳои маро аз назар гузаронда гуфт, ки бояд рентген кунем то ин ки сабаби дард карданашро муайян намоем. Сипас аз рӯйи натиҷаи рентген табобати дандони ман оғоз гардид. Ин духтури ҷавон хело нозукона ва бодиққат кор мекард Анвар Шерхонов ном дошта, донишгоҳи тиббии Украинаро хатм намудаву нав ба кор шӯруъ кардааст. Мавриди зикр аст, ҳаққи хизмат барои тоза кардани дандонҳо пеш аз пломба задан бо ҳисоби ҳама таҷҳизотҳои якбор истифодашаванда 47 сомонӣ ва нархи пломбаи оддӣ 107 сомониро ташкил медиҳад. 

Ҳама чӣ зери назар!

Ҳама кормандон бо ниқобҳои тиббӣ дар роҳравҳо мегаштанд. Барои боз ҳам дақиқтар намудан аз шароит ва муомилаи дигар духтурони клиникаи мазкур ба якчанд палатаҳо бо ҳар баҳонае даромадем ва бори бигар бовари ҳосил намудем, ки ҳама тоза ва таҷҳизотҳои наву замонави барои беморони дандон ва ҷоғу рӯй муҷаҳаз гардонида шудааст. 

Назди утоқи кории мудири клиника пур аз шаҳрвандон буд ва онҳо бо мушкилиҳои гуногун онҷо ҳозир шудаанд. Мудир ҳама шаҳрвандонро қабул намуда, дархосту муроҷиатҳои онҳоро ба назар мегирифт. Бо якчанд муроҷиаткунандаҳо ҳамсуҳбат шудем. Модаре бо кӯдакаш барои табобат омада буданду, аз муомилаи духтурон ва шароити клиника розӣ. Қосимов Маҳмадулло, мудири ин даргоҳи шифо ҳамаи шаҳрвандони наздашон даромадаро шахсан гусел намуда, маро низ ҳамчун бемор қабул намуд. Нахуст шуда диққати моро дар дар утоқи кории роҳбарият ин монитори калони насбшуда ҷалб намуд. Дар экран ҳама роҳравҳои калидӣ ва якчанд ҳуҷраҳои хизматрасонии беморон аён буд. Аз ин бар меояд, ки роҳбарият кори ҳамаро хуб назорат мекунад ва мебинад, ки духтурон бо беморон чӣ гуна муносибат доранд. 

Имтиёзҳои клиника

Дар сӯҳбат бо мо Маҳмудулло Қосимов гуфт, ки ба ин Пажуҳишгоҳ беморон аз тамоми гӯшаву канори кишвар меоянд.

   -Баъзан вақт ман хело рӯҳафтода аз он мешавам, шаҳрвандон имконияти табобат кардани дандонро надоранд. Масалан, ҳозир пеш аз шумо даромадан якчанд нафари дигар аз н.Айнӣ омада, гуфтанд, ки мо он маблағе, ки ба муолиҷаи дандон лозим аст, надорем. Дар муассисаи мо духтурони донишманд ва ботаҷриба кор мекунанд. Ҳамарӯза талаботҳои гигиению санитариро хуб назорат мекунем. Аз он рӯзе, ки хатари коронавирус тамоми дунёро фаро гирифтааст мо ҳар рӯз роҳравҳоро чанд маротибаи бо хлор ва дигар маҳлулҳо тоза мекунем. Кӯдаконӣ то 1 сола, калонсолони аз 80 боло, иштирокчиёни ҷанги Афғонистону Чернобил, ятими яктарафа ва гурезаҳоро клиникаи мо ройгон табобат мекунад. Ҳамзамон дар хуҷраи ёрии таъҷилӣ-5120 бемор ба маблағи 148480 сомонӣ хизматрасонии стоматологии ройгон расонида шуд, ки маблағи умумии он 265.578 сомониро ташкил медиҳад, - иброз медорад Маҳмадулло Қосимов.

Дар баробари фаъол будани шӯъбаҳои клиника боз шӯъбаи ҷарроҳии ҷоғу рӯй фаъолона кор карда, дар давоми соли 2019 бо маблағи 8052 сомонӣ 19 нафарро ройгон ҷарроҳӣ намудаанд.  Хулас, то ҷое ки дастамон мерасад ба ҳамаи беморон кӯмак мерасонем, зеро ин вазифаи ҳар як табиб аст”- мегӯяд директори Муасисаи давлатии пажуҳишгоҳии “илмию клиникии стоматология ва ҷоғу рӯй” номзади илмҳои тиб Маҳмадулло Қосимов. 

Шералӣ Давлатов, СССР

 21 март дар сар то сари ҷаҳон Рӯзи байналмилалии Наврӯз эълон шудааст. Ин қарор 19 феврали соли 2010 дар 64-мин ҷаласаи Ассамблеяи Генералии СММ қабул карда шуд. Дар банди 49 рӯзномаи ин ҷаласа, ки дар бораи "Маданияти дунё" ном дошт, чунин омода буд: "Ассамблеяи Генералии СММ 21 мартро чун  Рӯзи байналмилалии Наврӯз мепазирад ва кӯшиши давлатҳои баргузоркунандаи Наврӯзро дар бобати нигаҳдорӣ ва тарвиҷӣ фарҳанги Наврӯз истиқбол мекунад".   Ҳамин тариқ, Соли нави мардуми ориёитабор эътирофи ҷаҳонӣ пайдо кард. Албатта, ин кор ба осонӣ ба даст намомад, зеро барои ин солҳои тӯлонӣ ва заҳмати зиёде кашида шуд.

Бедории табиат

Ҳамаи қавму миллатҳо фарорасии соли навро бо як шаҳомату шукӯҳи хосае ҷашн мегиранд. Аммо соли нави мардуми ориёитабор ба куллӣ аз ҳамаи ҷашнҳои соли навии роиҷ дар дунё фарқ мекунад. Масеҳиён соли нави худро аз тавалуди ҳазрати Исо (с.а) ҷашн мегиранд.Соли нави қамарӣ,ки бештари нажоди сомӣ аз он табаият мекунанд аз ҳиҷрати Паямбари ислом (с.а) оғоз меёбад. Мардуми Шарқи Дур (Чину Ҷопон) низ соли нави ба худ хоссе доранд. Аммо ҳеҷ кадом аз инҳо, ҷавобгӯи аслии ин мафҳум, яъне оғози соли нав аз нигоҳи табиатро надоранд ва танҳо соли нави ориёӣ пурра ба ин мафҳум ҷавобгӯст.                                                     

 Чун маҳз дар фарвардин (март) табиат аз хоби зимистониаш бедор мешавад ва мардуми ориёитабор ин бедориро Наврӯз ном ниҳода, аз қадимтарин даврони таърихи хеш ин ҷашни бошукӯҳро то ба ин рӯз зинда нигаҳ  доштанд. Наврӯз чуноне, ки аз номаш маълум аст ҷашни миллии қавми ориёист ва метавон гуфт, бузургтарин ҳадяи ин қавм ба таммадуни башарист. Таърихи Наврӯз дар асотири ориёӣ ба замони Пешдодиён мерасад ва бештари муаррихон ин ҷашнро ба шоҳи 4-уми ин сулолаи афсонавӣ Ҷамшед марбут медонанд. Дар қадимтарин маъхази мардуми ориёитабор «Авасто» низ аз ин ҷашн ёд шуда, маҳз Ҷамшед дар он, чун поягузорӣ он зикр гардидааст.

18.03.1918. Кишварҳои Антанта-Россия, Британия Кабир ва Фаронса эълон карданд, ки созишномаи сулҳи Брестро, ки Россияи Шӯравӣ бо Олмон ба имзо расонида буд, қабул намекунанд.

18.03.1918. Бо қарори коллегияи Кумитаи Фавқуллодаи Умумироссиягӣ (ВЧК) дар тамоми вилоятҳо ва навоҳии Россияи Шӯравӣ Комиссияҳои фавқуллода таъсис дода шуданд.Тамоми нерӯҳои ҳарбии ЧК бошанд ба Дастаи ҷангии ВЧК муттаҳид карда шуданд.

18.03.1921. Артиши сурх бо сарварии Тухачевский шӯриши баҳрнавардон (матросҳо)-ро дар Кронштадт саркӯб кард. Матросҳо дар оғози инқилоб асоситарин тарафдорони болшевикон буданд, аммо баъди ҷанги шаҳрвандӣ назарашон тағйир кард ва зидди ҳукумати онҳо шӯриш бардоштанд.

18.03.1939. Дар шаҳри Мюнхени Олмон сарони Британия, Фаронса ва Олмон бо ҳам дидор карда, қарордоди Мюнхенро ба имзо расониданд. Дар натиҷаи ин қарордод Олмон вилояти Судети Чехословакия ва Венгрия Словакияи ҷанубӣ ва Украина Пасикарпатиро ғасб карданд. Ин қарордодро бисёриҳо чароғи сабз барои Гитлер унвон мекунанд.

18.03.1946. Дар СССР нақшаи панҷсолаи 4-ум ба тасвиб расид. Тибқи он СССР мебоист ба сатҳи то ҷангии истеҳсолот мебаромад.

18.03.1980. Ҳукумати ИМА фурӯши технологияҳои муосирро ба СССР таҳрим кард ва ин корро ба иттифоқчиёнаш низ мамнуъ намуд. 

19.03.1934. Дар СССР коргари совхоз Митрофан Никитин ҳангоми зиёрати Мавзолеи Ленин аз таппончаи "Наган" тобути Иличро тирборон намуд.

20.03.1926. Сарвари Чин, Чан Кайши тамоми коммунистони шӯравиро аз қаламрави кишвараш берун кард. 

20.03.1933. Дар СССР маркази пахши радиёии ба номи Коминтерн ба кор шурӯ кард. Ин маркази радиёӣ он шабу рӯз бузургтарин дар ҷаҳон маҳсуб меёфт.

20.03.1992. Дар пойтахти Украина шаҳри Киев аввалин дидори роҳбарони  Иттиҳоди Кишварҳои Мустақил (СНГ) баргузор гардид.

Мақомоти иҷроияи ҳокимияти давлатии шаҳри Левакант супориши дар боло зикргардидаро мавриди баррасӣ қарор дода, чунин иттилоъ медиҳад: Бояд қайд кард, ки вобаста ба пардохти музди меҳнат ва нафақаҳои нафақагирони имтиёзии корхонаи Ҷамъияти саҳомии кушодаи «Нуриҳои Осиё» в Вазорати молияи Ҷумҳурии Тоҷикистон мактуб ирсол  карда шудааст. Ба масъулини корхонаи мазкур дастур дода шуд, ки барои зудтар пардохт намудани музди меҳнати кормандони корхона чораҳои амалӣ андешанд.

З. Давлатзода 

и.в. раиси ш.Левакант